طمع الاهل حكايات صافي هاني
إنتي بتلعبي معانا؟
قلت له
لأ يا بابا
أنا أخيرًا بحسب
وقعدت قدامهم وحطيت قدامي باقي الورق
وقلت
فاكرين لما قلتوا إنكم ربيتوني؟
أنا حسبت تمن التربية
أول ورقة كانت إيصالات كهربا وغاز ومصاريف بيت من وأنا عندي ستاشر سنة
التانية كانت تحويلات بنكية كنت ببعتها لكم كل شهر
التالتة كانت صور شيكات دفعتها عن ديون مش ديوني
والرابعة كانت كشف حساب طويل جدًا
طويل لدرجة إن أمي فضلت تقلب فيه وهي مش مصدقة
قلت لها
ده إجمالي الفلوس اللي خرجت مني عشان البيت ده يعيش خلال آخر اتناشر سنة
أبويا بص للرقم
وسكت
قلت
إنتوا طالبين نص مرتبي
صح؟
هز راسه ببطء
قلت
أنا هديكم كل اللي إنتوا عايزينه
بس الأول خدوا حقكم من المبلغ ده
وسحبت الآلة الحاسبة من على رجله وحطيتها قدامي
وكتبت الرقم الكبير على الشاشة
وبعدين قلت
اتناشر سنة
كل شهر
من غير شهر واحد اتأخرت فيه
أمي قالت
بس إحنا كنا بنصرف عليكي وإنتي صغيرة
ضحكت وقلت
وأنا ما قلتش إنكم ما صرفتوش
أنا بقول إن اللي صرفتوه رجعتهولكم أضعاف
أبويا خبط بإيده على الترابيزة وقال
إنتي عايزة تحاسبينا على كل جنيه صرفناه عليكي؟
بصيت له في عينه وقلت
لأ
أنا عايزة أحاسبكم على كل جنيه طلبتوه مني بعد ما كبرت
السكوت نزل على المكان
لكن كان لسه فيه ورقة أخيرة في الظرف
وأنا كنت سايباها للآخر
طلعتها بهدوء وحطيتها قدام أبويا
وقلت
بس دي مش فلوس
دي أهم ورقة
أبويا مسكها
قرأ أول سطر
وفجأة وشه شحب
أمي قربت منه وقالت
اقرأ بصوت عالي
أبويا فضل ساكت
فأنا قلت
اقري يا ماما
أمي بدأت تقرأ
وبمجرد ما وصلت لنص الورقة
إيديها بدأت تترعش
لأن الورقة كانت عقد قرض بنكي
باسم أبويا
لكن الضامن فيه…
كان اسمي أنا
أمي بصتلي وقالت
إنتي كنتي عارفة؟
قلت
كنت عارفة من شهرين
أبويا قام واقف بسرعة وقال
مين اداكي الورقة دي؟
