يوم الخميس

أخو جوزي كان بيرجّع بنتي كل خميس وهي فاقدة الوعي لكن لما سمعت التسجيل، اكتشفت إن جوزي كان بيبيع أمان بنتنا عشان يسد ديونه!
أحمد كان واقف في آخر السلم، نص وشه غرقان في الضلمة، وعينيه مثبتة على اللابتوب المفتوح قدامي.
ما اتحركش.
ما سألنيش بسمع إيه.
وما حاولش حتى يمثل إنه مش فاهم.
بصلي ثواني طويلة، وبعدين قال بهدوء مخيف
إنتِ سمعتي إيه يا سارة؟
قفلت اللابتوب بسرعة، رغم إن التسجيل كان لسه شغال في دماغي، بكل كلمة قالها، وكل اعتراف خرج من بقه من غير ما يعرف إن فيه حد بيسمعه.
بصيت له وقلت
سمعت كفاية.
نزل السلم درجة درجة، لحد ما وقف قصادي.
كفاية لإيه؟
كفاية إني أعرف إنك عارف بنتك بيحصل لها إيه كل خميس، وإنك بتاخد فلوس مقابل ده!
ضحك ضحكة قصيرة، لكن ملامحه ما كانش فيها أي مرح.
إنتِ مش فاهمة الموضوع.
أمال فهمني! مين نادين؟ وإيه الناس اللي محمود بياخد ملك عندهم؟ وليه بنتي كل مرة بترجعلي فاقدة الوعي وعليها كدمات؟!
للحظة، بص ناحية باب المطبخ، وبعدها رجع بصلي.
وطي صوتك. البنت نايمة فوق.
الجملة دي كانت كفاية إنها تخليني أكرهه في اللحظة دي.
حتى وهو متهم في أذى بنته، كان كل اللي شاغله إن محدش يسمعنا!
قلت له وأنا بحاول أسيطر على رعشة صوتي
أنا مش هسكت. بكرة الصبح هاخد ملك وأروح المستشفى، وبعدها هبلغ الشرطة.
ملامحه اتغيرت فجأة.
مسك دراعي وقال بعنف
إنتِ مش هتعملي أي حاجة غير لما تسمعي مني!
حاولت أفلت إيدي.
سيبني!
سابني فجأة، ورجع خطوتين لورا، وبعدها غيّر نبرة صوته كأنه بيفتكر إن التهديد مش هيجيب نتيجة.
يا سارة، أنا غلطان، بس مش بالطريقة اللي إنتِ متخيلاها.
بصيت له باحتقار.
إنت لسه بتبرر؟
اسمعيني للآخر. أنا عليّا ديون كبيرة، أكبر مما تتخيلي. نادين كانت بتديني فلوس مقابل إني أوصل لها ملك كل أسبوع. هي كانت بتقول إن عندها مركز متخصص للأطفال اللي عندهم مشاكل في النوم والتركيز، وإنها بتعمل تجارب تحت إشراف دكاترة.
اتجمدت مكاني.
تجارب إيه؟!
كانت بتقول إن الأدوية آمنة، وإن الموضوع تحت السيطرة. أنا ما كنتش أعرف إن ملك هتوصل للحالة دي!
صرخت فيه
ما كنتش تعرف؟! وإنت بتقول لمحمود في التسجيل ما يسيبوش علامات؟!
سكت.
ولأول مرة من ساعة ما نزل السلم، ما لاقاش رد يقوله.
قربت منه وقلت
إنت عارف إيه اللي يوجع أكتر من إنك تكون كدبت عليّا؟ إنك كنت شايف بنتك بترجع مش قادرة تفتح عينيها، وكنت بتقف قدامي تضحك وتقول لي إني مجنونة!
نزل عينيه للأرض.
أنا كنت هوقف الموضوع.
إمتى؟ بعد ما تموت؟!
ما ردش.